Wednesday, December 23, 2009

لبنان الجميل

فكرنى صوت فيروز ببيروت ، مكنتش فاكرة انى ممكن اروح لبنان و اشوف سويسرا الشرق رغم ظروفها الغير مستقرة و كمان كنت حامل فى الشهر الخامس و كماااااااان فضلنا هناك شهر بحاله، و عشان الحياه مليانه مفاجئات قابلت صاحبتى إيللى ما بشفهاش فى مصر هناك فى بيروت.... لو كنت عارفه إنى حكتب عن رحلة بيروت كنت جبت الصور على فلاشاية من على الكمبيوتر بتاعى ايللى فى المانيا.... من احلى الأوقات ايللى قضيتها كانت فى بيروت، رغم انها كانت رحلة شغل لزوجى و كنت قاعده فى الأوتيل معظم النهار طبعا على غير عادتى انى منزلش و افضل فى الأوتيل لحد بعد نص النهار بشويه لكن عشان الدنيا كانت حر جدااااااااااااااااااااااااا و مكنتش اقدر استحمل الحر و انا حامل، لكن اول ما زوجى كان بيخلص شغله ايللى كان فى وسط البلد كنت بنزل و اروح اقابله هناك فى وسط البلد، اركب تاكسى و اتفرج على شوارع بيروت الجميله، و يا سلام بأة لما يعرف السواق انى مصرية! يفضل يتكلم السواق عن مصر و يسألنى انا منين من مصر و يسألنى إن كانت لبنان عجبتنى و لا لأ و لو قلت آة طبعا لبنان بلد جميله يرد و يقول ان لبنان مش مؤنث يعنى لازم اقول : لبنان بلد جميل مش جميله :) الحقيقه الناس هناك بيحبوا الحياه فعلا و طبعا السيدات و البنات فعلا بيتفننوا انهم يجملوا نفسهم و مدلعين نفسهم على الآخر، على فكرة بيروت فيها شبه كبير من إسكندريه انا قصدى المنطقه بتاعت الكرنيش لكن الجبال هناك روعه و رغم انى شفت جبال قبل كده لكن فى بيروت كان ليها طعم و احساس تانى مش حنسى طبعا لما ركبت التلفريك من اعلى الجبل لحد تحت خالص و الخوف ايللى كنت خايفاه رغم المناظر الجميله و طبعا زوجى استغل الموقف اسوأ استغلال و فضل يخوف فيّا و يضحك عليّا و عقدنى فى التليفريكات اساسا لدرجة اننا لما رحنا سويسرا بعد ما ولدت ما كنتش عايزة فى الأول انى اركب التلفريك بسببه! بس ركبته فى الآخر طبعا! المهم من الحاجات ايللى بفتكرها فى رحلة بيروت و اضحك لما مرة كنت نازله من الأوتيل و فجأه لقيت دبابه ماشيه فى الشارع طبعا اترعبت و قلت يا نهار اسود الحرب قامت !!!! كلمت زوجى بسرعه لكن ما ردش عليّا فاضطريت انى اركب برده التاكسى و اروح وسط البلد و طبعا فى سرى فضلت اقول فى سرى ايه ايللى انا عاملته فى نفسى ده انا ايه ايللى جابنى البلد ديه مانا كنت قاعده فى بيتى وقلت احنا خلاص مش راجعين تانى و مش حفرح بالبيبى و اربيه و فضلت متوتره لحد ما وسلط و قابت زوجى و قلتله ما صدقنيش و قاللى عادى عادى ماتخفيش! المهم وسط البلد ديه بأه حكايه تانيه.... تلاقى الكافيهات فى شارع كبير عند ميدان اسمه ميدان الساعه الشارع طويل و مقفول مش بتدخله العربيات و طبعا تشم ريحة الشيشه فى كل مكان و للأسفو كانت هى ديه اكتر حاجه دايقتنى فى لبنان بصراحه ! نرجع تانى لموضوع الدبابه ... مره كنا ماشيين على الكرنيش و كالعاده انا متحمسه و هاريه نفسى تصوير بالكاميرا و عدينا الشارع و طلب زوجى اصوره جنب تمثال جمال عبدالناصر فجأه لقينا عدد من الدبابات ماشى فى الشارع الرئيسى قدام عنينا و مافيش بيننا و بينهم متر، طبعا انا قلت بسسسس يبقى خلاص واضح ان فيه حالة طوارىء فى البلد و اننا فعلا الله يرحمنا و مش حعيش و اربى البيبى لكن قلت بما ان الكاميرا معايا كده كده يبقى لازم اصور الدبابات و فجأه و انا بصور لقيت العساكر ايللى فى الدبابه عمالين يعملولنا باى باى و يضحكولنا عشان بصورهم كانت حاجه آخر كوميديا و عرفت بعد كده ان ديه حاجه عاديه ان الجيش يتمشى بالدبابات فى الشارع ! يا خسارة فعلا كان نفسى انزل الصورة ديه على الموضوع ده بس مش مشكله ملحوقه لما ارجع ان شاء الله المانيا حنزلها... و دلوقتى حسيبكم مع صوت فيروز الجميل و استنونى عشان اكمل كلام عن زيارتى للبنان الجميله.... قصدى لبنان الجميل :))))) استنونى قريبا

No comments: